Cegerxwîn - Rêzanî Sözleri

Kürtçe SözleriTu rêzan be carek siyaset bixwîn
Bi vê xwendinê rêçika xwe bibîn

Bide pêşiya me wekî pehlewan
Bi zanîn me derbas bike, xwendevan

Eger bûyî carek tu rêzan û jîr
Ji bo dibî rokê xweş wezîr

Dikarî xebatek pir mezin bikî
Berîkê tijî gewher û dir bikî

Mijûl be bi zanîn û hem torevan
Bibe payedarek di nêv cihan

Bilîze bi zanîn di nav dewleta
Bibe jîr û hozan di nav mileta

Bi paye serê me bilindbî bi te
Bi zanîn çi bêjî guhê me li te

Ji bo me li her der bibe bervedêr
Di rojên şeran de bibe xurtemêr

Siyaset û tarîx û tora û rist
Bixwîne bi hev re ciwan û dirist

Bibe jîr û zana di her çax û dem
Ji ser me tu rake çi zor û setem

Tu rêzan be qurban xweşe zanebûn
Hebûn çêtire tim tim ji ”na” û nebûn

Tu hozan û rêzan be ey xwendewar
Bi van herdiwan dê bibî navdar

Ji milet re baş be ku bû karbidest
Bizane ku milet ji me ev dixwest

Dixwazim tu zû-zû bibî hoşîyar
Nebî zorperest bî bira wek neyar

Serê te bilind e dema rast herî
Emanet, ji kes re nebî wek terî

Dilê xwe mebe mal û zêr û pera
Gelek jîn xweş e lê bi rastî, bira

Ji milet re carek dibî sermiyan
Mehêle ku carek bibî lê ziyan

Ji bo te bere ew bibî dost û yar
Mirovê teres bî, ji jînê çi kar?

Xebata ji milet re karê te ye
Bizane ku ew jî şiyarê te ye

Bi rastî bi wî re eger xweş biçî
Çi bêjî ji wî re ewê bênî cî.

Cegerxwîn Şiirleri